عن أغنية “أي كلام”

الأغنية دي خدت وقت طويل جداً عشان تتكتب وتتنفذ، يمكن عشان فكرتها كانت صعبة جداً بالنسبة لي..لأن بداية الفكرة أصلاً هي إحساس حزين عند كتير من الناس اللي قابلتهم، أنا مش عايز أفسر أكتر من كده لأني حابب يكون أصل الفكرة مستخبي، الموضوع لوحده محزن ومؤذي نفسياً للناس اللي عندها الشعور ده، وخلينا نسميه: شعور السؤال اللي من غير إجابة.

المهم اكتشفت وأنا عمال أخبي أصل الفكرة وأداريها أكتر وأكتر جوه الكلام، إن الأغنية بقت تمثلني شخصياً وكأني بأغني لنفسي مش عن شعور حد تاني، واكتشفت إن ناس كتير جداً جداً الأغنية بقت بتتكلم عنهم! يااه.. ده طلع الموضوع كبير، وجوانا كلنا أسئلة ما لهاش إجابات، وظروف الواحد بيتحط فيها غصب عنه ومالوش يد فيها ومع ذلك الناس كل ما تشوفه تحاصره بالأسئلة والكلام والهري، وكأن في إيده أي حلول.. ما يعرفوش إنه زيه زيهم بالظبط، قاعد بيحاصر نفسه من جوه بالأسئلة اللي ما لهاش إجابات ومستني.. مستني أي حاجة تحصل تغير الظروف للأحسن، مستني الفرصة.. مستني ربنا يفتح له الباب.

نص تحضيري لأغنية أي كلام.. من الكراسة الخضرا فبراير ٢٠١٣
نص تحضيري لأغنية أي كلام.. من الكراسة الخضرا فبراير ٢٠١٣

عن الكلمات:

طبعاً جزء من صعوبة الأغنية إن محمود فاروق في الأيام دي دخل في موود كده ما يعلم بيه إلا ربنا وقرر يبطل كتابة.. وياعم يهديك يرضيك، أبداً.. قفش فجأة كده وقفل موبايله واختفى.. وده طبعاً لأني فقري بطبعي فلازم يحصل لي كل العكوسات اللي في الدنيا.. قال عايز تعمل حاجة بتحبها وعادي كده؟ لأ ازاي لازم يطلع #$##$ اللي @#$#@

المهم الفترة دي عملت رحلة بحث ضخمة محاولاً العثور على ناس تكتب الأغنية، وكلمت صحابي الشعراء زي محمد السيد وحازم ويفي وسامح خيري وغيرهم كتير جداً، لكن للأسف المحاولات كلها في الكتابة ما ظبتتش. وفكرت في فكرة جديدة كده، إني أدور على تويتر وأسأل المتابعين لو حد يعرف حد بيكتب، والحقيقة لقيت ناس كتيرة جداً موهوبة بشكل لا يصدق، ففكرت إني إعمل تمارين صغيرة كده.. منها تكون حاجة شيقة وتحدي ظريف للناس اللي بتحب تكتب، ومنها أقدر أعرف إمكانيات كل واحد..

فبدأت أسجل جملة لحنية معروفة (مش ليا) وأحطها على ساوندكلاود وأقول للناس اللي يقدر يتخيل إيه الفكرة المناسبة للحن ده ويكتب عنها بحيث تبقى متركبة على اللحن مظبوط يبعت لي.. الطريقة دي بيستخدمها أغلب اللي بيكتبوا شعر غنائي، وهي الكتابة على لحن موجود بالفعل، ودي ملكة مش أي حد يعرف يعملها.. محمود فاروق متميز فيها جداً. النتيجة إن التجارب كلها كانت أكتر من رائعة، واتعرفت فيها على شاب موهوب جداً اسمه “مأمون عرفة”.

هتلاقوا التجارب كلها في الكومنتات على اللحن ده جوّه ساوندكلاود (ملحوظة اللحن مش بتاعي دي أغنية تركي معروفة)

كلمت مأمون وطلع من كفر الشيخ ولسه في الجامعة، واتفقنا ينزل القاهرة ويجيلي الاستوديو نفكر مع بعض في الكلمات، وفعلاً بدأ يكتب، وطلع أفكار كتير جداً، بس أنا كنت رخم شوية وكنت عايز الكلام يتكتب بطريقة معينة كده، واحد بيكلم نفسه وفيه أسئلة حائرة، ولوم للذات وبعدين شوية صبر كده على طبطبة.. أغنية معقدة بجد..

قعدنا بتاع شهر كده نكتب ونهدّ ونكتب ونِهدّ.. زهقت الواد ياعيني.. المهم بدأ اليأس يتسرسب إلى أمعائي وقولت خلاص يابني سيبك منها إن شالله ما عنها طلعت ايه هتموت نفسك يعني، خش في الأغاني اللي بعدها.. وفعلاً بدأت أجرب في أغاني تانية زي “ضلمت” و”اسمعني”  و”يالالا” وفصلت تماماً منها.

بعد فترة طويلة لا بأس بها لقيت محمود فاروق بيكلمني تاني وبيقول لي إنه راجع يكتب وخلاص ده كان دور برد وراح لحاله.. طب أعمل فيه إيه ده؟ أحط له السم في صنية المسقعة زي فيلم موعد على العشاء؟  اهو اللي حصل بقى والحمد لله إنه رجع يكتب، وبدأنا نستأنف الكتابة.. ومن ضمنها الأغنية دي.. مأمون كان كتب أجزاء أكتر من رائعة، بس الكوبليهات كانت لسه مش مظبوطة.. يعني ركب شوية من الPuzzle بس كانت الصورة لسه مش كاملة..

aykalam 4

نص مبدئي لأغنية أي كلام.. من الكراسة الخضرا أبريل ٢٠١٣
نص مبدئي لأغنية أي كلام.. من الكراسة الخضرا أبريل ٢٠١٣

محمود كمل على كلام مأمون أخيراً والأغنية اكتملت بعد معاناة.. وبقي إني أبدأ في توزيع الأغنية وتسجيلها.

آه نسيت أقولكم إني فضلت محتار أسمي الأغنية إيه.. كنت في الأول مسميها “سؤال”، وبعدين قولت “نفس السؤال”… وبعدين قولت هيبقى اسمها “ياريت” .. وبعدين قولت أسميها “أي كلام”.. وبعدين قولت لأ الناس هتعتقد إنها أغنية ألش قبل ما يسمعوها وده غلط.. المفروض اسم الأغنية يوحي لك بصورة ذهنية معينة تكون إلى حد ما قريبة من موود الأغنية.. يعني ما ينفعش أعمل أغنية اسمها “فرحتي” مثلاً وتسمعها تلاقيها أغنية حزينة.. لو كنت سميتها “يا فرحتي” كانت هتبقى أصح في الحالة دي..

قولت أسميها “وأرد بأي كلام” وبعدين لقيت الاسم طويل كده.. هنا بقى وفي الحيرة دي خدت رأي كذا واحد أثق في رأيهم، وأغلبهم قالولي أحسن اسم هو “أي كلام”.. أي نعم الناس هتفتكرها أغنية خفيفة كده بس ده شعور مؤقت لحد ما يسمعوها ويتصدموا يا عيني.. وساعتها اسم الأغنية هيبقى معبر جداً بالنسبة لهم.

عن اللحن:

اللحن في مقام نهاوند الFa، ما فيهوش لعب كتير ولا Escapes، صريح وهادي ومش معقد، لأن الأغنية عبارة عن واحد بيكلم نفسه، مش محتاج فلسفة كتير في رأيي.

جملة “وأرد بأي كلام” اللحنية هي أول حاجة طلعت في اللحن، وبعد كده جت بقيت الجمل بتاعت الكوبليهات والكورس.

ملحوظة: ساعات بيبقى تكوين اللحن عبارة عن جملة رئيسية بتطلع الأول وبتبقى عاملة زي العجينة المكورة دي عند بتوع الفطائر، وبعدين بتقدر تفردها وتطلع منها ألحان تانية.. معلش أنا جعان فالمثال جه معايا كده.

عن التوزيع:

قررت أوزع الأغنية بنفسي من الألف إلى الياء.. لأني بحبها جداً ومتخيل الشكل اللي المفروض تكون عليه كويس أوي.. كان في الأول الآلة الرئيسية هي العود، وبعدين حسيت إنه مالوش علاقة بموود الأغنية، الأغنية إلى حد بعيد عاطفية.. ولقيت إن الأكورديون ممكن يبقى هايل ويوصل الإحساس صح.. أغنية حزينة بس طفولية شوية وهادية، والأكورديون هيطلّع المستمع من موود الاكتئاب الصرف ده وهيعمل مزيج غريب كده.. هتبقى “أغنية حزينة بس لما باسمعها باستريح”.. فاهمنني؟

الجملة الصولو اللي اتلعبت في نص الأغنية عزفها “وائل النجار” باقتدار، وائل في رأيي من أهم وأحسن عازفي الأكورديون في الوطن العربي، ودي مش مبالغة.. اللي عارفينه هيوافقوني رأيي..

سجلت الصولو على تراكين وعملت لهم Panning التراكين بيتلعبوا زي بعض بالظبط لكن في آخر ضلع في الصولو واحد فيهم بيكمل الجملة لحد الركوز تحت، والتاني بيقول نفس الجملة بس Octave أعلى، وحطيت Delay عليهم فبقى للأكوديون Space و Stereo image ظريف. الDelay ده Plugin اسمه H-Delay

خدوا اسمعوا كده وانبسطوا 🙂 أنا عن نفسي بانبسط كل ما تيجي الحتة دي.. بتمثل لي حاجات كتير ما ينفعش أقولها هنا 😀

وبالمرة حابب أسمعكوا حتة جوه التوزيع، فيها كذا Layer هارموني وأعتقد ممكن كتير ما يكونوش خدوا بالهم منه، فبما إني اتحرق دمي في الأغنية دي فحرام الحاجات دي تعدي جوة الأغنية، يارب تعجبكم.
هحط كل Layer واحد واحد فوق بعضه لحد ما الجملة كلها تتبني.. يلا مين جدع يقول لي دي أي جزء من الأغنية؟

الميكس:

هنا عملت الميكس بنفسي، ودي أول أغنية بدأتها في مرحلة ميكس الألبوم، وبعد ما خلصت الميكس ونزلت أسمع في العربية زعلت من نفسي جداً.. ايه العك ده يا حمزة! واضطريت أعيد الميكس من الأول تاني كله لأني خدت الأغنية لحتة تانية غير اللي كنت عايزها للأغنية.. المفروض تكون أغنية حزينة وهادئة والإيقاع فيها شرقي أكتر.. أنا كنت مصدّر الDrums  جداً والأغنية كانت Bright أوي.

الأغنية استخدمت فيها ال Analog Summing Technique وكان لايق عليها عشان إداها Warmth أكتر، الجهاز اللي استخدمته هو Dangerous D-Box

كفاية كده النهاردة وأسيبكم مع الأغنية.. يارب أكون قلت حاجة مفيدة

Advertisements

40 Comments

Add yours →

  1. طريقه كتابه المدونه حلوه اوى وممتعه بالنسبالى فما بالك بالاغانى نفسها .. ربنا يوفقك يارب وكان نفسى ابقى موهوب فى حاجه عشان اتعرف عليك واعرف افيدك بحاجه

    Liked by 1 person

  2. الاغنيه ديه بالنسبه لي كانت حلوه لحن جداااا و كلمات بس كنت ضايعه في الهدف منها… خصوصا في اول الاغنيه يعني فعلا لما اريت دلوقتي انت فعلا مخبي حاجه فيها …

    Liked by 1 person

  3. إمتى حتتخرج؟
    إمتى حتتوظف؟
    إمتى حتتجوز؟
    إمتى حتخلف؟
    إمتى حتموت؟
    أسئلة بتخنق وبتخليني فعلا أسيبهم وامش عشان ماسمعش سؤالهم ثاني

    ياريت لو تحكلنا من فضلك كمان شوية عن ال video lyricd

    Liked by 2 people

  4. الاغنية هيدي بالذات من اروع اغاني الالبوم من لما سمعتها ما وقفت بكا وحسيتها عم تحكي عني اول ما سمعتها تذكرت كيف الناس دايما بس تشوفني بتسألني عن اخي المفقود و عن اخباروا من دون ما تراعي شعوري بسبب هيدا السؤال

    Liked by 2 people

    • بجد ما شاء الله مجهود جبار .. ربنا يقويكم ازيكم خير على كل دة .. فعلا اغانيك بتعلق في دماغنا لانها بتكون هادفة و بتحكي عننا .. الحمد لله ان ربنا رزقنا بيكم
      وبالمناسبة انا عملت account دلوقتي حالا على wordpress.com بس عشان اعلق واشجعك اكتر واكتر لانك فعلا تستاهل ^_^

      إعجاب

  5. عرفت دلوقتى الاغانى ليه بتطلع كلها حلوه وبتعلق علطول مع الواحد ودايما ليها موقف تمشى عليه
    عشان المجهود الكبير والاتقان والحب الى الاغنيه بتتعمل بيه

    Liked by 1 person

  6. الاغنيه تحفه ..و بعد الشرح و المجهود ده حبيتها اكتر و حسا اني بسمعها بطريقه مختلفه و احلى بكتييييييييييييييييير

    Liked by 1 person

  7. هادى عماد 1 يونيو,2015 — 12:31 ص

    يا حمزة انا بعرف اكتب شعر عندى اغانى ليك ممكن تعجبك
    بتشتكى ليه م الحال .. اوعى تقول انه مال .. دا احنا لينا رب كريم .. بـ الحال هو عليم ..بأذنه هتبقى فل وخيريه علينا هيهل .. مهما تقسى عليك الظروف اوعى تسلم نفسك للخوف شيل حلمك على كتافك واوعى تبص للى خانك خليك واقف مكان ددا ياما قبل منك شاف متستسلمش متبقاش خواف عشان تحقق حلمك مش محتاج مصباح سحرى يلا قوم ورا حلمك اجرى طبعا هتقول انى مولود فى بقى معلقه دهب لكن انا انسان بسيسط ومازلت ولا عمرى هكون ولا كنت لكن انا جوييا اصرار وعلى راى المثل من خرج م الدار يتقل المقدار
    انا مألف اكتر من 30 قصيدة وحياة اغلى حاجه عندك
    01271031949

    إعجاب

  8. هادى عماد 1 يونيو,2015 — 12:37 ص

    شق شق النهار قوموا يا كبار ويا صغار يلا على حلمنا نجرى يلا قوم من نومك ولا ضهرك ارمى همومك اصحى يلا ورا حلمك بأى طريقه هاته حتى لو هتكلمه على فيس بوكه وشاته خلاص خلص وقت النوم اوعى تدى فرصه للهموم اجرى ورا حلمك واعمله زووم دا مفيش حاجه بقيالك غيره كل واحد مسؤول عن قراره خلى قرارك لحلمك متسبش الزمن يغشك اوعى تفضل واقف مكانك روح لحلمك دا تعب م الوقفه وسابك اوعى تقعد قليل الحيله ضاع من عمرك سنين طويله متحطش ايدك على خدك لو سسبت حلمك ذمبك على جمبك

    إعجاب

  9. رائع رائع رائع
    اتابع كل تدويناتك باستمرار ، مع اني مش بفهم بالمزيكا بس لاني احبها واتذوقها فانا استمتع بكل ملاحظاتك لما اقراها 😌
    وعندي دائما فضول اعرف كواليس الاغاني اللي احبها، يعني احب اعرف ازاي اتعملت اللحن والتوزيع والكلمات وكل المحاولات والتغييرات اللي حصلت بالاغنية قبل ماتطلعوها بشكلها الاخير

    الاغنية دي بتمثلني وتمثل كل انسان يحمل الاحساس ده
    احساس صعب واليم بس بعتبر الاغنية دي حاجة تطلع منتا المشاعر السلبية رغم انها بتلمس الجرح

    الجزء اللي انت حطيتو هو مقطع : “ويادنيا رسينا من جي على مين فينا …… الى ……. وارد باي كلام ”

    وشكرا ربنا يخليكو لينا ويوفقكو ياحمزة ويا كل فريق العمل واحدواحد
    واتمنى منكو تنزلو النسخة الكاريوكي بتاعت كل اغاني حمزة

    من اكبر جمهورك
    اسمى/السويد

    إعجاب

    • وكمان اضافة بخصوص عنوان الاغنية
      انا من ساعة مانزل الالبوم حبيت كل اغانيه بس اكتر حاجة ادمنت عليها هم التلاتة دول
      ١- مع السلامة ٢- مظلوم ٣- تسمحيلي
      اما اغنية اي كلام كنت اعديها عشان العنوان وعشان الموسيقى بالبداية كانت بتوحيلي انها اغنية شبابية بطابع اجنبي وبعيدة عن اللون الشرقي اللي انا بستمتع بيه
      بس لما سمعتها اتصدمت فعلا حاجة تانية خالص متخيلتهاش ابدا تكون بالجمال ده

      وتمنيت تتكلم اكتر عن الكوبليه المفضل بالنسبة لي
      “جوانا هموم سنين… ” ❤️❤️❤️

      الكوبليه ده معجزة والله

      إعجاب

  10. من يومك رائع بمعني الكلمة

    إعجاب

  11. عاوز اقولك على حاجه
    عشان انت كدا موهوب ومجتهد ومجدد دايما انت رقم واحد في العرب
    بتمنالك كل التوفيق يا نجم

    إعجاب

  12. الالبوم فيه كذا اغنية حلوة جدا ..
    لكن بالنسبة لي دي كانت اكتر اغنية قريبة مني في الالبوم ، يمكن لأني في نفس الحالة دي و افظع بقالي ما يقارب من 8 شهور .. و الاغنية نزلت في عز ازمتي و ذروة احساسي ..
    و كمان المقال بجد مكتوب بطريقة حلوة اوي والله و خفيفة كده و لطيفة و قريبة للواحد 😀
    يعني يحسسك كده كأننا في حوار و مناقشة مفتوحه مش مقال بالمعني الحرفي و الطريقة المعهودة ❤

    إعجاب

  13. بجد الاغنيه دى كامله من كل حاجه وبجد من الاغانى اللى هتعيش… مزيد من التوفيق استمر ❤

    إعجاب

  14. رائع يا حمزة احسن حاجة انكوا فريق اصحاب مفيش تلاكيع في الشغل ودي احسن حاجة

    إعجاب

  15. إية دة ياعم الحج ؟ انا كنت فاكر الموضوع ابسط من كدة بكتير جداً بس طلع معقد فشخ 😀
    بس انا دلوقتى عرفت لية الاغانى الحلوة بتطلع حلوة 🙂 عشان وراها شغل على نضيف (Y) احييك يافنان على الاغنية والالبوم كله ودايما فشيخ من نجاح لنجاح.

    إعجاب

  16. مجهود رائع 😃
    الحمد لله ان استاذ محمود رجع يكتب تاني لانه بصراحه كلماته بتلمس القلوب هنزعل كلنا لو بطل كتابه بصراحه 😮
    الجزء من اول وأرد بأي كلام واقول والله تمام واسيبهم وامشي عشان ما اسمعش سؤالهم تاني
    ويا دنيا جرالك إيه بتعاندي معايا ليه أنا بس غلطت ف إيه وليه قلبي بيعاني
    جوانا هموم سنين ولا نبقى مبينين فى عنينا الضحكة لكن من جوه مدمعين وتمر كتير ساعات
    بنفكر في اللي فات معقولة العمر عدى بينا كده من سكات
    ويادنيا رسينا مين جاي على مين فينا قصرنا فى حاجة معاكى ولا عملنا اللي علينا
    وأرد بأي كلام واقول والله تمام واسيبهم وامشي عشان ما اسمعش سؤالهم تاني
    يارب تكون صح 😊

    إعجاب

  17. أسناذ حمزة الدفوف جميلة جدا 🙂 لايف ؟

    إعجاب

  18. رائع جداً ، وفعلاً فيها حكاية مستخبيّة بالكلمات بتوعها
    ومافيش تعب الّا وبنحصد مجهود كبير وبيرضينا بالنهايةة

    إعجاب

  19. good job….no excellent job …chapeau

    إعجاب

  20. انت شغلك حلو جداا و كل اغنية بتبقى حالة على بعضها كلماتها بلحنها بتوزيعاتها و ميكساتها و سلاطاتها و بابا غنوجها
    و بصراحة انا كدة كدة كنت خايف اعمل اغنية لان احتمال انها تتحسب عليا اكبر من انها تتحسبلي و لما قريت انت بتعمل الاغاني ازاي مابقتش خايف بالعكس بقيت مرعوووووب لان مفهوم ان الواحد يعبي شريط بقى مسيطر على ناس كتير ربنا كريم.
    تحياتي ليك جدااا و احسنت جداا جدااا

    إعجاب

  21. اغنيه اكثر من رووووووعه من كلمات بتعبر عن حاجات كتير جوانا وف الاخر فيها امل والموسيقى عجبانى جدا ….,وتعبت فيها بس وصلت للناس ف الاخر 🙂 😀

    إعجاب

  22. الاوكرديون اختيار هايل .. شغل الميكس ممتاز
    اما الغنوة فبالنسبالى هيا ٢٠١٤
    بجد برافو

    إعجاب

  23. الاغنية رائعه جداااااااااااا وواقعيه انا اول ما سمعتها تخيلت الاغنية كلها علي سؤال في بالي وفكره جميله اوي ان السؤال يكون مجهول وكل واحد يشوف السؤال من منظوره

    إعجاب

  24. سؤال صغير جدا.
    هو حضرتك من الكوكب ده ؟!!!!!

    إعجاب

  25. اختيار الاكرديون كان مناسب جدا و انا كان نفسي اعرف اية الاغاني اللي استخدمت فيها analog summing فشكرا انك قلت 🙂 🙂

    إعجاب

  26. حمزة.. انا طلعت لوحدي هارموني الكمنجات و التشيلو..العود و الاكورديون واضحيين اوي.. لكن التانيين.هارموني محنكيين ؛)

    إعجاب

  27. ياعم حمزه انا عايز اشوفك بقي ماتعزبنيش اكتر من كده بالحانك بقي 👍

    إعجاب

  28. ِahmed el sheikh 4 يونيو,2015 — 3:00 ص

    زي الفل يا حمزه .. عاوزين بقي ما بتستناش يا قطر 😀

    إعجاب

  29. استاذ حمزة نمرة اختي نفسها تكتبلك 🙂

    إعجاب

  30. فعلا الاغنية دي بتعبر عن حالنا كتير والمشكله ان الناس بتسأل وخلاص ومش مهم
    السؤال دا بيأثر فيك ازاي او انت بتحاول اصلا تلاقي ليه رد ولا لا وسايب السؤال
    فعلا بتسأل كتير عن حاجات ملهاش رد اصلا عندي حتي بيني وبين نفسي بس كل واحد
    بيبقي عايز يخرج من الحاله الي عنده بسؤال يمكن يلقي رده عند غيره حاجه ملخبطه
    بس اهم حاجه ان كل اغنيه ليك ليها نفسيه عندي بجد 🙂

    إعجاب

  31. حمزه… انا بعمل كلمات اغاني وشايف الاغنيه دي انت احسن واحد تغنيها
    اسمها …عايز ضحكه

    عايز ضحكه وفرح كبير…وشي تعبني من التكشير……..لو بفلوس الضحك بكام..وهاتلي منه اكوام واكوام…واستعجلي يا عم اوام…علشان في ناس زي كتير…والي يقولك افرح واضحك…انا همي يبكي ومش بضحك..شيل الهم الاول منك…وتعالي انصحني بضمير ….

    لو عجبتك …. 01004016800

    إعجاب

  32. الأغنية دي أكتر من رائعة ياحمزة، و اللحن بتاعها عظيم جدًا. و بشكل عام مقام “النهاوند”، و مقام “الكورد” فيهم سحر عجيب كده!
    ياريت تهتم أكتر بالألحان، تكون في السكة الدافية دي.. أنا عارف إنك كمبدع بتحب تغير و تجرب كل حاجة.. بس بجد السكة دي تحفة. ربنا يوفقك.

    إعجاب

  33. abdelrahman katamesh 6 يونيو,2015 — 3:03 ص

    المقطع من الثانيه 54 مع جمله ارد بأي كلام لحد الدقيقه 1:14 ثانيه صح كدا ولا غلط يا استاذنا ….وهوا في باص جيتار بيلعب مع الدف ولا دي تهيقات ولا ايه 😃😃???

    إعجاب

  34. محمود عمار 8 يونيو,2015 — 2:04 م

    راااااااااااااااااااااااااائع استاذ حمزة
    ممكن اعرف شو البلجنز الستخدمة في مكس الايقاع – خصوصا الشرقي

    إعجاب

  35. .I love your blog. I salute you for not being afraid to reach out to amateur talents. Keep them coming

    إعجاب

  36. Süper olmuş 🙂

    إعجاب

  37. حمزه انت فنان موهوب وانا بحبك وبأحترمك جدا وبأحترم الفن الي انت بتقدمه
    انا من مدرستك وبحب اعمالك
    انا بكتب شعر واغاني بس مش اي حاجه انا بكتب نقد اجتماعي واغاني اجتماعيه
    عامل اغناني عن التواضع والطموح وغيره وغيره
    محتاج انك تشوف اي منها انا حلمي ان حد زيك يشوف الكلمات دي وتوصله وانا حاولت اتواصل معاك بس مش عارف ازاي وملقتش غير هنا الي ممكن تشوف حاجه زي دي .

    دا رقمي لو حبيت تديني الفرصه اني اوريك اعمالي 01118900751

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: