عن أغنية “يا مظلوم”

أنا فاكر كنت معدي بالعربية في روكسي في أواخر ٢٠١٢ ووقفت عند بتاع الشاورما اللي هناك – مش هقول اسمه هو عارف نفسه كويس – وطلبت أوردر وبعدين وأنا مستني جاتلي فكرة تيمة موسيقية صغيرة.. رحت بسرعة مسجلها على الموبايل، ودي كانت التيمة اللحنية في الجزء “يا مظلوم ارتاح، عمر الحق ما راح” بس من غير كلمات طبعاً.. مجرد لحن فاضي كده. لما بدأنا نعمل جلسات العمل والمزيكا مع محمود فاروق، افتكرت التيمة دي، فسمعتهاله وقعدنا نفكر إيه الإحساس اللي بتوصله التيمة دي.. المهم لقيت محمود في ساعتها بيدندنها وبيقول “يا مظلوم ارتاح..” وحسيت فعلاً إنها بتوصل الإحساس ده.. اللحن فيه حزن شوية وإحساس بالشكوى..وبدأنا نشتغل.

Scan 12
النص التحضيري لأغنية يا مظلوم.. من الكراسة الخضرا مايو ٢٠١٣

الكلام ده كان في أوائل مايو ٢٠١٣، عشان بس فيه ناس فاكرة إنها لأحداث معينة.. الحقيقة إني وقتها كنت كل اللي بأفكر فيه إن الإحساس بالظلم أصبح جزء أصيل في التركيبة النفسية للمصريين، يعني هتلاقي في كل بيت فيه حد ظالم حد.. في كل شارع.. في كل شركة.. في كل عيلة!

أنا عندي قناعة إن في أغلب الأحوال الظلم ما بيترفعش في الدنيا، والظالم ممكن يعيش حياته بالطول وبالعرض، أما المظلوم ففي الغالب بيفضل حاسس بالقهر طول عمره وبيفضل شايل اللي حصل له ومش مسامح فيه.. لأن لا الناس نصفوه، ولا عرف ياخد حقه بالمحاكم اللي بتقعد بالعشرة والعشرين سنة، وبلاش نهري أكتر من كده كلنا عارفين يعني!

فحسيت إن الأغنية لازم توصل للظالم والمظلوم إن قصتكم مع بعض مش نهايتها في الدنيا دي وخلاص، لكن في يوم هتقفوا فيه قدام رب عادل وهناك هتاخد حقك يا مظلوم، وهتدفع التمن يا ظالم.

طبعاً أغلب المظاليم بيبقوا الناس الغلابة الجميلة والطبقات الكادحة في رأيي، لذلك صممت إن الأغنية تكون واخدة من القماشة بتاعتهم موسيقياً، اللحن، التوزيع.. يكون فيه روح شعبية جميلة بالمفهوم الشعبي الأصلي مش اليومين دول.

Scan 13
النص الأصلي لأغنية يا مظلوم.. من الكراسة الخضرا مايو ٢٠١٣

الكلمات:

زي ما قولت، كلام يوصل للناس العادية خالص ولاد البلد، يحب يسمعه سائقو التاكسي والميكروباص وكده، وفي نفس الوقت حاولنا يكون فيه قيمة.. وده أعتقد إن محمود نجح فيه إلى حد كبير..

ما خدتش مننا وقت كبير في الكتابة.. الكلام واللحن طلعوا مع بعض في القعدات بتاعتنا، طبعاً لو سمعتك شكل القعدات دي بيبقى عامل إزاي هتتفاجئ بمدى التوهان والضياع الفني اللي بنبقى فيه.. انت طبعاً متخيل بقى اننا بنكتب وبنلحن حاجة واضحة كده وجملة على بعضها ويا تعجبنا يا نعمل غيرها… إنما الصراحة يا عزيزي..

احنا بنبقى زي العيال الصغيرة اللي أهلهم اشتروا لهم لعبة Puzzle كبيرة وصعبة، والعيال فتحوا العلبة والقطع اتفرطت في كل حتة، وبيقعدوا بقى ينمّوا ذكائهم واحدة واحدة.. تصدقوا فعلاً ده أحسن تشبيه! إزاي كان تايه عني.. طب اسمعوا وانا راضي ذمتكم.. جايين نهرج والله:

طبعاً معظم الكلام اللي طلع في القعدة دي ما استخدمناهوش، وبعد كذا قعدة استقرينا على النص النهائي.. لكن أثناء التسجيل ساعات بتظهر عيوب في النص ما تقدرش تكتشفها قبل التسجيل وتدخل في الجد.. غالباً بتبقى عيوب في نطق بعض الكلمات اللي لما بتيجي ورا بعضها ما بتبقاش مفهومة.. لما بتقرأ النص بتبقى حلوة وواضحة لكن تيجي تغنيها تلاقيها ضربت منك..

في الأغنية دي كانت نهاية الكوبليه الأول هي المشكلة أثناء التسجيل.. الكلمات كانت “صبرك ده رب كبير.. عليه التدبير ولا بينسى”.. المعنى جميل وكل حاجة.. بس آجي أسجلها وأسمعها لمراتي تقوللي “ايه؟”.. ولما شخص بأثق في ودنه ما يبقاش فاهم الكلام يبقى فيه مشكلة حقيقة.. اضطرينا نغير نهاية الكوبليه ده على سكايب كده والحمد لله ربنا سهلها ورزقنا بنهاية كوبليه أجمل “صبرك ده رب كبير.. عليم وبصير ولا بينسى”

اللحن:

اللحن طالع بشكل رئيسي من بياتي ال”فا” – ودي سكة مش مريحة لعازفين الكمان، وفي الحفلات بنضطر يا إما الكمان يتظبط وينزل التيون بحيث يلعب من سكة بياتي “مي”.. يا إما أنا أنزل الأغنية كلها نص تون وتبقى بياتي “مي” أو أرفعها تون وتبقى بياتي “صول”.. الموسيقيين هيفهموني هنا.

اللحن فيه Bridge بأهرب فيه من البياتي إلى الصبا، وده طبعاً مقام محبوب جداً لغالبية المصريين على الرغم من إنه مقام حزين وغامق.. كان عندي محاولات للBridge مختلفة عن اللي اعتمدتها، لكن ممكن أستخدمهم في أفكار أو أغاني تانية تليق عليهم أكتر.

التوزيع:

إيمري موجولكوش (موزع تركي) عمل فكرة ناجحة في رأيي لتقديم أغنية مفهومة موسيقياً لقطاع كبير من الناس العادية البسيطة.. وده الهدف من الأغنية أصلاً.. استخدم المكونات الشهيرة اللي بتبقى في الGenre ده زي الكمانجات والعود والإيقاع الشرقي.. والBridge خلاه يبقى درامي أوي بالإيقاع (ومسيرنا ف يوم هنتحاكم) صحيح ده مش الشكل اللي كنت أفضله لكن أعتقد أنه مناسب جداً للأغنية وفكرتها.. وده من الحاجات اللي اتعلمتها.. إن مش شرط كل حاجة في الأغنية تعجبك أو تبقى على مزاجك.. الأصل إنها تخدم الهدف من الأغنية وتوصل الإحساس المطلوب.. ده أهم شيء.. حتة تفضيلاتك بقى دي تيجي في الآخر وممكن تتجاوزها لو الهدف متحقق.. فيه فنانين بيستغرقوا في كل جزء في الأغنية، وعايز كل حتة فيها تبقى على حسب هواه ١٠٠٪.. غالباً الأغنية بتاخد وقت ومجهود أطول والنتيجة ممكن تطلع أقل من لو كنت سيبت الموزع والمؤلف والملحن يساهموا بشخصياتهم وأفكارهم ولمساتهم في الأغنية.. ما تخافش طالما الروح واصلة والهدف من الأغنية متحقق.

إيمري لما عمل مقدمة الأغنية كانت أول فكرة جاتله هي الفكرة اللي موجودة حالياً في الCD.. لكن لما سمعتها خفت تكون طويلة شوية على المستمع وبما إننا في عصر السرعة والناس بتتخنق أسرع فقولت له يعمل فكرة تانية أقصر (دايماً بيبقى عندي هاجس إن الأغنية كده طويلة ولازم تقصر.. بخاف جداً اللي بيسمعني يزهق).. وفعلاً عمل فكرة تانية وكنت فعلاً هعتمدها لكن براء خريجي (منتج فني في أويكنينج والمسئول عن إنتاج الألبومات الموسيقية وصديق عزيز جداً) راح للموزع في زيارة عمل لأغنية أخرى.. وبالصدفة سمعه الفكرة الأولى الطويلة.. فبعت لي إيميل وقالي يابني حرام عليك نفسك الإنترو ده جميل جداً ولايق ع الأغنية أكتر.. وقال لي ما تقلقش من طول المقدمة.. الأغنية أصلاً Melo والمستمع عايز يسمع مقطوعات موسيقية تدخله في جو الأغنية.. الصراحة هو كان عنده حق والحمد لله إني ما نشفتش دماغي كالعادة 😀

وده الGuide بتاع المقدمة القصيرة بصوت الموزع (عادة بتبقى الجايدات بالطريقة دي لو حد مستغرب.. وصوتي هنا كان مجرد تسجيل Guide برضه مش نهائي)

الميكسينج

اللي عمل الميكس هو إمرا (أخو الموزع) وبعد ما خلص الميكس بتاعه.. بعت لي كل الSession وأنا ظبطت ميكس الVocal بتاعي وعملت شوية تظبيط هنا وهناك لزوم الوسواس القهري.

كفاية كده عشان أنا نفسي زهقت من الرغي.. يارب أكون فدت أي حد هنا..

أغنية يا مظلوم..

Advertisements

39 Comments

Add yours →

  1. بجد تعبتوا جداً .. والأغنيه اصلاً جميله جداً .. ربنا يوفقكوا دايماً يارب 🙂

    إعجاب

  2. أحمد رضوان 21 مايو,2015 — 12:13 ص

    بجد بجد .. مطرب أكتر من رائع وأكتر مطرب بحبه ف مصر لكن فيه شريحة كبيرة من الناس اللي بيعيقها عن سماع أغاني حضرتك انها بتنزل بموسيقى
    رجاء مني لحضرتك لو شايف كومنتي دا نزل فرجن من أغانيك بدون موسيقى لأننا حاولنا كتر نحذفها بشتى البرامج والكل أجمع انه مستحيل ولازم اللي ينزل الأغنية بدون موسيقى يكون صاحبها نفسه … شكراً لسعة صدرك وآسف لو أزعجت حضرتك

    إعجاب

  3. أينعم انا مفهمش اى حاجه ف التلحين والتوزيع ولا ف الموسيقى اصلا بس بحس باستمتاع فظيع وانا بدخل هنا واقرا الكلام ده 🙂 🙂
    وبصراحه بعدى كل الكلام الخاص بالشغل ده ومش بقراه اصلا حتى اسامى الموزعين او الملحنين لو فى حد تم ذكر اسمه بمر عليه مرور الكرام من غير اهتمام
    اللى يسمع حمزه اصلا يغرم بيه لدرجة انه لو عطس ادامه هيقول الله , سمعنى تانى كده ..
    🙂

    إعجاب

  4. بنت المغرب 21 مايو,2015 — 12:17 ص

    انت رائع واغانيك رائعة أتمنى لك كل التوفيييق

    ياريت تعمل حفل في بلجيكا .
    انت وماهر زين طوووب

    Liked by 1 person

    • L’un des rares chanteurs arabes que je suis si ce n’est le seul, on sent qu’il met du cœur dans tout ce qu’il fait
      Heureuse de voir qu’il est de plus en plus connu au Maroc car il est quasiment pas médiatisé chez nous, personnellement je l’ai découvert grâce a Khawater
      !Salutations bent bladi

      إعجاب

  5. مريم الجزائرية 21 مايو,2015 — 12:18 ص

    عمل رائع وفي الصميم أغنية في قمة………. ربنا يريح كل مظلوم

    إعجاب

  6. بصراحه انا مش بعمل مشروع ولا حاجه بس البوم جميل جدا وبين عليه خد مجهود كبير جدااا وديه روح الفضول بصراحه 😃
    بالتوفيق ان شاء الله وبعدين اي حد عنده حتت الوسواس القهري عادي يعني مش مشكله 😂
    واحلي حاجه انك فاهمنا ودماغك زيينا بالتوفيق كمان مره 😄

    إعجاب

  7. احمد هاشم 21 مايو,2015 — 12:25 ص

    بص هو الصراحة بقى نادر جدا جدا اننا نلاقي حد بيهتم بالموسيقى بالشكل ده , الالبومات كلها بقت قلبة وقومة , شوية تراكات تكنو على شوية هبل وكده خلص الالبوم , انا احييك على مجهودك وعلى فنك وربنا يقويك .

    إعجاب

  8. منه لله الوسواس القهري ده! أسبوعين وأنا بكتب موتيفيشن لتر ومش راضية تخلص بسببو
    مقطع “صبرك ده رب كبير.. عليم وبصير ولا بينسى” من أحسن المقاطع في الأغنية
    أتمنى نسمع لك حاجة جديدة في رمضان و ربنا يسهلها عليكم في الأعمال القادمة

    إعجاب

  9. أينعم انا مفهمش اى حاجه ف التلحين والتوزيع ولا ف الموسيقى اصلا بس بحس باستمتاع فظيع وانا بدخل هنا واقرا الكلام ده 🙂 🙂
    وبصراحه بعدى كل الكلام الخاص بالشغل ده ومش بقراه اصلا حتى اسامى الموزعين او الملحنين لو فى حد تم ذكر اسمه بمر عليه مرور الكرام من غير اهتمام
    اللى يسمع حمزه اصلا يغرم بيه لدرجة انه لو عطس ادامه هيقول الله , سمعنى تانى كده ..
    🙂

    إعجاب

  10. شيماء الجزائر 21 مايو,2015 — 12:46 ص

    و الله أحسن أغنية في الألبوووووووووووم ………….أرتاح جدا حين سماعها ………..روعة بزاااااااااااااااااااااااااف

    إعجاب

  11. ربنا يوفقك يا حمزه انتا فعلا المطرب اللى عندو رساله فنيه بجد ومميز عن اى فنان تانى مع احترامى للفنانين
    بس انتا باعمالك دى فعلا بتوضح كل اللى جوانا بالعربى يعنى بتقول كل اللى جوه كل شاب ومش عارف يعبر عنه
    بالتوفيق يارب وديما من نجاح لنجاح

    إعجاب

  12. انت مطربي المفضل ونفسي تغنيلي حاجة

    يا بلدي متسألنيش

    عن الدم الي سال…

    دا كان دمي ولا كان دمك…

    دا شال حزنك وشال همك…

    ونطق الاهه من فمك..

    لكن يا بلدي بقولهالك…

    ولا يهمك.

    ومتسألنيش…..!

    عن الضي الي زال…

    دا نور عيني ولا نور عينيك…

    دا نور رسم الضحكة علي جبينيك…

    دا فجر طالع من قلب الي فاكرينك..

    ومتسألنيش…..!

    عن وليدي…

    ابو ضحكة ترج الكون…

    ابو صرخة تبكي جفون….

    وهبته ليكي شهيد فأول يوم..

    ومرتحناش….

    ولا شافت عنينا النوم…

    حلفننا ننسييكي زمان الشوم…

    ونخلقلك لسعدك يوم.

    ومتسألنيش…..!

    عن يوم السعد والفرحة…

    عروسة لابسة من السواد طرحة….

    راح العريس وبقيتي انت يا طاهرة…

    ما انتي الامال فالحسرة والقهرة.

    يابلدي هانت…

    ولسه ياما تهون…

    هزمنا الظلم..

    كرهنا الهم…

    رسمنا الدنيا طعم ولون.

    بكرة احلي للي عايزينك..

    وانسي ماضيكي..

    والي كارهينيك..

    هنفديكي كمان ..

    بألف سهيد..

    ونرجعلك ليالي العيد…

    ونحلملك..

    ببكره جديد…

    يضم الكل ويضمك..

    ولا يهمك..!

    إعجاب

  13. جميـــــــــــــل جدااا بس طــــــالب منك تقوللنا ايــه الـ plugins اللي استخدمتهااا في الـ vocal mixing
    و يـــا ريت اسم محل الشاورما عشان لسه متعشيتش 😀 ❤

    إعجاب

  14. أحلى رغي والله 😀
    كلامك يبعث على الراحة ويجبرك على الضحك .. يا ريت تعمل رواية ..
    أؤكد لك أنك ستنجح نجاحا باهرا .. أسلوبك في السرد رائع جدا أشعرني أنني كنت حاضرا معكم أثناء العمل على الألبوم :)))

    إعجاب

  15. الاغنية دى جاية فى وقتها النهاردة ، ياااه بتتعبوا كل ده . بس فعلا ما شاء الله تعبك بنتيجة دايما 🙂 ربنا يبارك فى كل شغلك .

    إعجاب

  16. اغنية تحفة وفنان محترم جدااا بتتعبوا اووى ربنا معاكوا ودايما تطلع الاحسن 🙂

    إعجاب

  17. استمر بجد .. انا استفدت جدا 😊

    إعجاب

  18. انت ازاي كدا يا حمزة …. انا استفدت عن نفسي …

    إعجاب

  19. فعلا اﻷغنيه تعبتم فيها عشان كده هي طلعت بالشكل التحفه ده
    وعاجبني ان حضرتك بتحكي بالتغصيل مع اني مابفهمش في اللحن والتوزيع والكلام ده…ربنا يكرمك ومن نجاح الى نجاح دايما

    إعجاب

  20. برنس البرانيس بجد :’D

    إعجاب

  21. انا مش عارف لية انك متكونش نجم مصر الاول ! لية المحترمين ملهومش مكان وكمان خامة صوتك وكلام الاغانى ملهاش حل مش زى ناس يقعد يقول نص ساعة بجبك والنص التانى وانا كمان يا رب توصل للناس كلها 😀

    إعجاب

  22. انا مش موسيقية و لا ليا في الليلة دي خالص و قريت كل حرف و ما فهمتش و لا كلمة … بس مستمتعة جدا لمجرد اني بقرأ كلام لحمزة نمرة على مدونة حمزة نمرة
    بجد انت إلهام لناس كتير انت مش مجرد مغني … ربنا يقدرك و تكون سبب في تغيير الناس للاحسن

    إعجاب

  23. معتز حسين 21 مايو,2015 — 11:23 ص

    يا استاذ حمزة انا واحد بكتب في مواضيع انسانية واجتماعية وتقريبا نفس الاسلوب اللي انت بتغنيه ونفسي اقدر اتواصل معاك اوريك حاجة من اللي كاتبها يمكن تعجبك يل ريت اقدر اتواصل معاك
    اسمي معتز حسين
    سني ٢٩
    وده رقم تليفوني لو حابب٠١٠٠٢٤٣١٨٩٥

    ودي حاجة صغيرة كاتبها

    الدنيا مش غابة غيلان
    ولا بر مليان بالامان
    الدنيا لغز تقدر تحله
    لو تملا قلبك بالايمان

    إعجاب

  24. الألبوم كله تحفة كالعادة زي الألبومات اللي قبله ده مش جديد عليك
    بس اسم الراجل بتاع الشاورمة ايه 🙂

    إعجاب

  25. بجد بجد اغنيه بتتكلم عن حااال ناس كتير جميله جدان

    إعجاب

  26. احمد امين 21 مايو,2015 — 12:14 م

    من تقدم الى تفوق بصراحه من احسن الاغانى الموجوده وانت من احسن ما اخرج الغناء المصرى عن راى اتحدث

    إعجاب

  27. هههههههههههههههههههههههههههههههههههه جميل

    إعجاب

  28. بشوف عاءلة علاء عبدالفتاح فى الاغنية دى

    إعجاب

  29. والله بجد انا عمرى مكنت هفكر انى هتحول من المطربين اللى عادين الى حمزه نمره وكايروكى بجد انت عالمى ومطرب جيل بجد وانا بحب جدا الالبوم ده ولاتبكى جاااااامد

    إعجاب

  30. الاغنية رائعة جد جدا جدا انا بحبها جدا
    و بحب اغنية التغريبة تذكرتي رايح جاي بعيط عليها كتيير مع اني هنا في مصر مش متغرب

    هيا و اغنية اوعدوني

    اغنية لالا بعشقها جدا اغنية مسخرة

    إعجاب

  31. الاغنيه جميله جدا
    وانت شخصيه عسليه ازلا ولو حتي غنيت شعبي هنسمعلك 😂

    حتي الاغاني الحزينه بتاعتك فيها تفائل 😍

    إعجاب

  32. Mohammad Elbagdady 22 مايو,2015 — 10:54 م

    والله انت برنس يا حمزة
    مع إني في حاجات كتيرة مش فاهمها عشان مش دارس لكن في العموم الفكرة وصلت واستفدت حقيقي
    وربنا يباركلك انا اتعلمت حاجات كتير من ال 4 مواضيع اللي انت كتبتهم دول
    وكمل بقى عايز اعرف اكتر عن صناعة الاغنيه عشان انا زميل لسه بابتدي يعني (- _-)

    إعجاب

  33. شكرا يا حمزة انا استفدت جدا خاصة في موضوع ال puzzle دة………..مستنيين بقيت الاغاني

    إعجاب

  34. انا مبفهمش مزيكا أساسا ولا مقامات والكلام دة مش عارفه ايه اللى خلانى أدخل المدونه واقرأ بكل تمعن وانا مش فهمه جزء كبير من الكلام اصلا ! بس دة لو دل على شئ يدل على أنك فنان بجد أنت وال team work بتاعك
    بجد استمروا #محتجينلكم فى حياتنا ✌

    إعجاب

  35. بجد انت فنان محترم اوي وبجد من احسن مغنيين مصر بجد ♥

    إعجاب

  36. أنت رائع ..
    تحية ليك من غزة الغزة 🙂

    إعجاب

  37. ما شاء الله ابداع و الله أكتر من ابداع ربي يحفظك يا منشدنا الرائع

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: