عن أغنية “مع السلامة”

خلينا ناخد الأغاني بالترتيب الزمني اللي اتعملت فيه.. مش بترتيبها في الألبوم.. يمكن تلاقوا في السياق الزمني الأصلي لكل أغنية دلالات ورؤى جديدة أو مختلفة عن اللي وصلت لكم وانتوا بتسمعوا الأغنية في السي دي..

الحقيقة إن أول أغنية اشتغلنا عليها كانت أغنية “مع السلامة”.. هي صحيح ترتيبها في الألبوم آخر أغنية بس هي أول حاجة طلعت مننا أنا ومحمود فاروق..

عن الكلمات:

أنا فاكر بعد كام يوم من القعدات المشتركة بيني وبين محمود والرغي اللي مالوش أول من آخر.. وكنا في فبراير ٢٠١٣ تقريباً.. خلصنا رغي وقولت أعمل نفسي شيك وأوصله.. واحنا في السكة قعدنا برضه نرغي وقالي لي إن وهو في الخدمة في الجيش كتب كام حاجة كده..وقعد سمعني شوية أشعار وبتاع.. الصراحة ما سمعتش ولا كلمة من اللي قالهم لأني كنت مخنوق م الزحمة وعمال بقاوم فكرة إني أقتله وأرميه ع الدائري وألف وأرجع.

فجأة رنت ف وداني جملة هو قالها “ومع السلامة السلامة”.. عجبتني جداً فكرة تكرار كلمة “السلامة” مش عارف ليه.. ما اعرفش بقى فيها سحر عجيب كده ولا فيها إيه.. المهم قولت له تعالى نشتغل عليها من بكرة.

تاني يوم قعدنا وكتب أفكار كتير.. وتالت يوم.. ورابع يوم.. قعدنا بتاع شهر وشوية نكتب ونهد اللي اتكتب ونجرب تاني.. الأغنية دي اتكتبت ست مرات تقريباً! كل مرة بأفكار مختلفة عن الغربة..طلّعت عين الواد ياعيني..

أنا عادة مش مقرف أوي كده.. هو أنا غتت ومزعج ومؤذي بس مش للدرجة دي يعني.. مش لدرجة ست مرات كتابة.. بس هي فعلاً الأغنية كانت تحدي كبير.. أولاً لأنها في موضوع أنا غنيته قبل كده ومحمد السيد أبدع فيه بكلماته في أغنية “تذكرتي” اللي بأعتبرها من الأغاني المهمة ليا واللي يمكن الناس شايفاها من أفضل الأغاني اللي غنيتها والحمد لله.. وبالتالي لازم أخلي بالي عشان ما أقعش في فخ المقارنة.. يعني مش عايز أعمل أغنية ألاقيك أول حاجة تعملها إنك تقارن بينها وبين تذكرتي.. بالعكس، المفروض ما تفتكرهاش أصلاً.. بمعنى إن الأغنية تدخلك في حالة جديدة بعيدة عن حالة تذكرتي.. وبالتالي استبعدت إني أوصّل مشاعر الغضب في “مع السلامة” وقولت الأفضل تكون مشاعر حزينة..

وهنا مشكلة تانية.. المشاعر الحزينة دي دوامة وممكن تاخد الواحد لتحت تلاقي الأغنية قلبت سواد سواد.. وهنا حد هيسألني مستنكراً “وهي أغنية مع السلامة كده مش سواد!”.. أقول له أيوة.. بالنسبة للي اتكتب في الخمس مرات..

يعني مثلاً في إحدى المحاولات خلينا المتكلم أب مسافر.. وطبعاً بغض النظر عن إننا وقعنا في خطأ التخصيص الزيادة عن اللزوم (يعني مش لازم أكون أب عشان أحس بالغربة والفراق).. لكن لك أن تتخيل كتبنا ايه.. وتتخيل ليه، خد مثلاً الجزء ده اللي بيوصف الأب لما بينزل أجازة يشوف ولاده..

“بصيت ف عنين ولادي

مش هنسى اللحظة ديا

وأنا شايف حد تاني

بيعرّفهم عليا…”

عشان تعرفوا إني شايل عنكم بلاوي والله 😀

المهم حاولت أبعد عن اللي فات ده كله، لذلك محاولات الكتابة كانت كتير.. لحد ما حسيت إني عايز أغني عن مشهد وداع بسيط جداً ممكن أي واحد فينا يحسه.. سواء مسافر أو مش مسافر.. إحساس الفراق.. أي فراق بينك وبين حد بتحبه أو شيء كنت مخلص له.. أنا الأغنية بتمثل لي مشهد وداعي لأهلي ومراتي (خطيبتي وقتها) وأنا في صالة المطار في ٢٠٠٣.. كان مشهد حزين جداً وقعدت أسح واتشحتف طول السكة في الطيارة وما اعرفتش آكل وكان يوم منيل..

المهم.. بعد ما محمود كتب كل الأغنية ما فضلش في الكلمات غير إني أحاول ما أعديش Threshold الحزن، اللي بأعتقد إني لو عديته أبقى بأعمل وصلة تعذيب نفسي مش أغنية..

الموضوع بيبقى دقيق جداً ولازم تبقى واخد بالك منه طالما هتغني أغنية melo .. في النهاية انت بتعمل عمل فني وكل أملك إنه يوصل للمستمع ويتأثر بيه ويحب يسمعه كتير.. مش كرباج بتجلده بيه.

النص الأصلي لأغنية مع السلامة.. من الكراسة الخضرا فبراير ٢٠١٣

عن اللحن:

فضّلت آخد مقام الكورد لأنه قريب من قلوبنا كلنا وبسيط، مع هروب Escape صغير جداً لمقام صبا زمزمة.. التوليفة حسيت إنها مناسبة للموضوع وحاولت الأغنية ما يبقاش فيها انفعال زايد عن اللزوم.. لأن اللحظة هي لحظة ضعف وانكسار مش قوة ولا غضب، وفيها تطييب خاطر..

العود مكون رئيسي للأغنية وحسيت إنه أكتر آلة لايقة على الإحساس بالحزن والفردية في الكلمات.. (جملة العود كنت مألفها من فترة وقمت بتوظيفها في الأغنية كجملة رئيسيةHook  وكورس Chorus في نفس الوقت)

عن التوزيع:

مصطفى نجم حاول إنه يوصل الإحساس اللي في الأغنية، ويخرج بيها من دائرة الملل أو الحزن الزيادة، وده بإضافة Beat قوي ومتماسك، وحاولنا بالكمانجات إعطاء الأغنية روح شرقية (عربية أقصد).. وأتمنى نكون نجحنا.

الميكس:

عملت الميكس زي ما انتوا سامعين كده.. السيشن حوالي ٨٠ تراك ده غير ال Aux والBuss Mix ..

ودول الPlugins اللي اشتغلت بيها عشان أعمل الEnvironment للأغنية زي Reverb & Delays – steroeo image – etc..لو حد حابب يسأل أسئلة متخصصة أكتر أنا جاهز

أما بالنسبة للPlugins اللي استخدمتها على تراك الMain Vocal فهتلاقوهم في الScreenshot دي

Plugins used on my Main Vocal Track

وأخيراً اسمعوا الحتة دي.. الجزء ده من الكمانجات بحبه أوي.. Sendur Guzelel هو اللي كاتب الكمانجات.. واحنا في الاستوديو بنسجلها الراجل كان شوية ويقولي كفاية عياط عينك هتنشف كده.. لو جدعان تقولولي التشيللو Cello ده كان في أي حتة في الأغنية بالظبط؟

كفاية كده النهاردة.. يارب أكون قلت حاجة مفيدة