عن أغنية “مع السلامة”

خلينا ناخد الأغاني بالترتيب الزمني اللي اتعملت فيه.. مش بترتيبها في الألبوم.. يمكن تلاقوا في السياق الزمني الأصلي لكل أغنية دلالات ورؤى جديدة أو مختلفة عن اللي وصلت لكم وانتوا بتسمعوا الأغنية في السي دي..

الحقيقة إن أول أغنية اشتغلنا عليها كانت أغنية “مع السلامة”.. هي صحيح ترتيبها في الألبوم آخر أغنية بس هي أول حاجة طلعت مننا أنا ومحمود فاروق..

عن الكلمات:

أنا فاكر بعد كام يوم من القعدات المشتركة بيني وبين محمود والرغي اللي مالوش أول من آخر.. وكنا في فبراير ٢٠١٣ تقريباً.. خلصنا رغي وقولت أعمل نفسي شيك وأوصله.. واحنا في السكة قعدنا برضه نرغي وقالي لي إن وهو في الخدمة في الجيش كتب كام حاجة كده..وقعد سمعني شوية أشعار وبتاع.. الصراحة ما سمعتش ولا كلمة من اللي قالهم لأني كنت مخنوق م الزحمة وعمال بقاوم فكرة إني أقتله وأرميه ع الدائري وألف وأرجع.

فجأة رنت ف وداني جملة هو قالها “ومع السلامة السلامة”.. عجبتني جداً فكرة تكرار كلمة “السلامة” مش عارف ليه.. ما اعرفش بقى فيها سحر عجيب كده ولا فيها إيه.. المهم قولت له تعالى نشتغل عليها من بكرة.

تاني يوم قعدنا وكتب أفكار كتير.. وتالت يوم.. ورابع يوم.. قعدنا بتاع شهر وشوية نكتب ونهد اللي اتكتب ونجرب تاني.. الأغنية دي اتكتبت ست مرات تقريباً! كل مرة بأفكار مختلفة عن الغربة..طلّعت عين الواد ياعيني..

أنا عادة مش مقرف أوي كده.. هو أنا غتت ومزعج ومؤذي بس مش للدرجة دي يعني.. مش لدرجة ست مرات كتابة.. بس هي فعلاً الأغنية كانت تحدي كبير.. أولاً لأنها في موضوع أنا غنيته قبل كده ومحمد السيد أبدع فيه بكلماته في أغنية “تذكرتي” اللي بأعتبرها من الأغاني المهمة ليا واللي يمكن الناس شايفاها من أفضل الأغاني اللي غنيتها والحمد لله.. وبالتالي لازم أخلي بالي عشان ما أقعش في فخ المقارنة.. يعني مش عايز أعمل أغنية ألاقيك أول حاجة تعملها إنك تقارن بينها وبين تذكرتي.. بالعكس، المفروض ما تفتكرهاش أصلاً.. بمعنى إن الأغنية تدخلك في حالة جديدة بعيدة عن حالة تذكرتي.. وبالتالي استبعدت إني أوصّل مشاعر الغضب في “مع السلامة” وقولت الأفضل تكون مشاعر حزينة..

وهنا مشكلة تانية.. المشاعر الحزينة دي دوامة وممكن تاخد الواحد لتحت تلاقي الأغنية قلبت سواد سواد.. وهنا حد هيسألني مستنكراً “وهي أغنية مع السلامة كده مش سواد!”.. أقول له أيوة.. بالنسبة للي اتكتب في الخمس مرات..

يعني مثلاً في إحدى المحاولات خلينا المتكلم أب مسافر.. وطبعاً بغض النظر عن إننا وقعنا في خطأ التخصيص الزيادة عن اللزوم (يعني مش لازم أكون أب عشان أحس بالغربة والفراق).. لكن لك أن تتخيل كتبنا ايه.. وتتخيل ليه، خد مثلاً الجزء ده اللي بيوصف الأب لما بينزل أجازة يشوف ولاده..

“بصيت ف عنين ولادي

مش هنسى اللحظة ديا

وأنا شايف حد تاني

بيعرّفهم عليا…”

عشان تعرفوا إني شايل عنكم بلاوي والله 😀

المهم حاولت أبعد عن اللي فات ده كله، لذلك محاولات الكتابة كانت كتير.. لحد ما حسيت إني عايز أغني عن مشهد وداع بسيط جداً ممكن أي واحد فينا يحسه.. سواء مسافر أو مش مسافر.. إحساس الفراق.. أي فراق بينك وبين حد بتحبه أو شيء كنت مخلص له.. أنا الأغنية بتمثل لي مشهد وداعي لأهلي ومراتي (خطيبتي وقتها) وأنا في صالة المطار في ٢٠٠٣.. كان مشهد حزين جداً وقعدت أسح واتشحتف طول السكة في الطيارة وما اعرفتش آكل وكان يوم منيل..

المهم.. بعد ما محمود كتب كل الأغنية ما فضلش في الكلمات غير إني أحاول ما أعديش Threshold الحزن، اللي بأعتقد إني لو عديته أبقى بأعمل وصلة تعذيب نفسي مش أغنية..

الموضوع بيبقى دقيق جداً ولازم تبقى واخد بالك منه طالما هتغني أغنية melo .. في النهاية انت بتعمل عمل فني وكل أملك إنه يوصل للمستمع ويتأثر بيه ويحب يسمعه كتير.. مش كرباج بتجلده بيه.

    النص الأصلي لأغنية مع السلامة.. من الكراسة الخضرا فبراير ٢٠١٣
النص الأصلي لأغنية مع السلامة.. من الكراسة الخضرا فبراير ٢٠١٣

عن اللحن:

فضّلت آخد مقام الكورد لأنه قريب من قلوبنا كلنا وبسيط، مع هروب Escape صغير جداً لمقام صبا زمزمة.. التوليفة حسيت إنها مناسبة للموضوع وحاولت الأغنية ما يبقاش فيها انفعال زايد عن اللزوم.. لأن اللحظة هي لحظة ضعف وانكسار مش قوة ولا غضب، وفيها تطييب خاطر..

العود مكون رئيسي للأغنية وحسيت إنه أكتر آلة لايقة على الإحساس بالحزن والفردية في الكلمات.. (جملة العود كنت مألفها من فترة وقمت بتوظيفها في الأغنية كجملة رئيسيةHook  وكورس Chorus في نفس الوقت)

عن التوزيع:

مصطفى نجم حاول إنه يوصل الإحساس اللي في الأغنية، ويخرج بيها من دائرة الملل أو الحزن الزيادة، وده بإضافة Beat قوي ومتماسك، وحاولنا بالكمانجات إعطاء الأغنية روح شرقية (عربية أقصد).. وأتمنى نكون نجحنا.

الميكس:

عملت الميكس زي ما انتوا سامعين كده.. السيشن حوالي ٨٠ تراك ده غير ال Aux والBuss Mix ..

ودول الPlugins اللي اشتغلت بيها عشان أعمل الEnvironment للأغنية زي Reverb & Delays – steroeo image – etc..لو حد حابب يسأل أسئلة متخصصة أكتر أنا جاهز

Pro Tools-1

أما بالنسبة للPlugins اللي استخدمتها على تراك الMain Vocal فهتلاقوهم في الScreenshot دي

Plugins used on my Main Vocal Track
Plugins used on my Main Vocal Track

وأخيراً اسمعوا الحتة دي.. الجزء ده من الكمانجات بحبه أوي.. Sendur Guzelel هو اللي كاتب الكمانجات.. واحنا في الاستوديو بنسجلها الراجل كان شوية ويقولي كفاية عياط عينك هتنشف كده.. لو جدعان تقولولي التشيللو Cello ده كان في أي حتة في الأغنية بالظبط؟

كفاية كده النهاردة.. يارب أكون قلت حاجة مفيدة

Advertisements

28 Comments

Add yours →

  1. اغانيك كلها ممتازة يا حمزة .. وبصراحة حلم حياتي أغني معاك

    إعجاب

  2. مبدع والله حمزه .. قصة الاغنية عيشتني اللحظه اكني كنت معاكم 😀 استمرررررررررررررررر عشان مفيش منك 2

    إعجاب

  3. هههههههههه مرمطة 😀 فعلاً شاعات بتكون كاتب حاجة هي كأغنية أوك أو كشعر أوك تمام بس ممكن جزئية صغيرة تحس انك مش مقتنع بيها تروح مشقلب كل حاجة =D الكتاآبة >> انت بتلعب بالكلمات والكلمات بتلعب بيك !

    إعجاب

  4. هههههه دي مرمطة مش أغنية !
    بس انا ممكن أسأل حضرتك سؤال ..
    يعني حضرتك بتقول ان اول خطوة بتبقى كتابة الكلمات وبعدين بتبدأ تلحن ! بس انا ف حد اعتقادي أن الشعر نفسه أو القصيدة وهي بتتكتب بيكون الكاتب مرتب ابياتها ووازنها بأسلوب ينفع يتلحن أو لا ! يعني مش أي كلمات تنفع تتلحن حتى لوهي خفيفة وبتتقرأ على الرتم السريع ..
    هل ده يعتبر صح ولا الملحن الي بيكون دارس موسيقى اصلا بيعرف يتعامل مع الكلمات بشتى الطرق ؟!

    إعجاب

  5. مصطفى محمود 24 فبراير,2015 — 7:51 م

    فعلا والله بدعيلك من قلبى بجد انت مثال للفن الراقى الهادف والله بجد بجد انا مش بحب اسمع اغانى بحس انى باخد عليها ذنوب لكن مع اغانيك بحس بحاجه تانى خالص لانها فعلا اغانى هادفه وبتعالج قضايا معينه …..بحبك فى الله يا شيخ #حمزة 🙂

    إعجاب

  6. cello في الكوبليه التاني .. (“دنيا بتجمعنا مرة وتفرق بينا 100”)
    بصراحة انا متابع المدونة دي في معلومات بتتقال وكمان تفاصيل الحياة تقريبا و الألبوم ده بيتنفذ حاجه رائعة .. بالتوفيق 🙂

    إعجاب

  7. عبد الرحمن السيد 22 أبريل,2015 — 2:39 ص

    فين بقية تحليل الالبوم يا حمزة..مستنى

    إعجاب

  8. يا حمزة فين تحليل بقيت اغاني الالبوم………انا باستفاد جدا من اللي بتكتبوا

    إعجاب

  9. mohamed abdullah 4 مايو,2015 — 2:59 م

    انت بتتكلم عن الأغنيه كأنك بتتكلم عن نتيجة إمتحان علي أد مهتقعد تدح وتسهر وتحفظ وت>اكر علي أد مهتعرف نتيجه عملك فالأخر وبعدين فيه حاجه كمان انت بتتكلم فأغانيك عن الواقع اللي احنا عايشينه الواقع ده اللي هو حياتنا اليوميه مش مجرد مشاعر ممكن نحسها فلحظات معينه فبالتالي عشان تحس انك أخدت مشهد من حياتك وعملته علي هيئة أغنيه ده فحد زاته عناء كبير جدا
    ربنا يوفقك يا حمزه

    إعجاب

  10. حمزه نمره : انت فنان محترم اوعى فى يوم تحرمنا منك وتقولنا مع السلامه السلامه :/

    إعجاب

  11. بالتوفيق ………. وياريت نعمل ماتش كورة مع بعض 😀

    إعجاب

  12. الله يقويك كل شغلك روووعه ❤

    إعجاب

  13. انت صوتنا اللي مش نعرف نوصله يا حمزة ❤

    إعجاب

  14. انا بحبك يا نقى

    إعجاب

  15. والله انك لتجمع بين الرقي والطرافة والجمال والابداع والاحساس والوطنية .. ببساطة كل شيئ جميل .. تحية لك لن أقول من معجب بل من أخ جزائري يتمنى أن تشرفنا مرة أخرى بحفل وزيارة تشفي به شوقنا لك :))

    إعجاب

  16. الCello ده كان في مقطع “سكة يا عالم اخرها ومفيش قدامنا غيرها وسنين سايبلنا دايما في قلبنا علامة وتعبت يا دنيا فيكي من همي دعيت عليكي خدتي حقوقك وحقي سايبه ليوم القيامة ومع السلامة السلامة …”
    ربنا يقويك ويجعل اللي انت بتعمله في ميزان حسناتك
    انت مثال للفن الراقي

    إعجاب

  17. مع اني مش بفهم اوي في الموسيقي بس حسيت اني عايش معاك و كده و اتخيلت نفسي في كل التفاصيل دي

    إعجاب

  18. كل أغانيك تحفه ربنا يوفقك

    إعجاب

  19. اعتقد الcello ده باظبط في الدقيقة 2:23 من الاغنية

    إعجاب

  20. التشيللو Cello ده كان في أي حتة في الأغنية بالظبط؟
    في البداية
    والله ياميت خسارة .

    إعجاب

  21. مرحبا كيفك فنانا بتمنى تكون بخير معك محمد السوسي مغني راب و منتج موسيقي من غزة بوزع و بعمل مكس .. .. انا متعطش لتفاصيل اكثر عن الالبوم لانه احنا في غزة ما عنا جامعات و ما عنا اماكن الها خبرة في مجال الموسيقى … و عندي اقتراح تاني .. بتمنى يكون في جلسة نقاش عن التوزيع و الهندسة ببقى شيء رائع و خيالي تحياتي .. من غزة – فلسطين
    moh.elsusi@gmail.com
    00970597510092

    إعجاب

  22. ياعم مش فاهمه الحاجات دي بيتس وهووك والخ
    بس اهم حاجه الاغنيه ممتازه والمزيج فيها رائع
    حقيقي ماكنتش عارفه ان البساطه دي وراها كل الحاجات والايقاعات الي انا مش فاهماها دي
    بس حقيقي ممتازه

    إعجاب

  23. انا كامهندس صوت وموزع موسيقي بستفاد منك ومن تعليقاتك الموسيقية وبتعرف علي plugins

    إعجاب

  24. ده انت طلع عينيك عشان تطلع الشغل ده .. كنت عارف انك هتعمل حاجة جديدة ومختلفة ومؤمن بفنك المحترم وده اللي مخليني مكمل المشوار

    دمت بخير #حمزة_نمرة

    إعجاب

  25. لا والله بتتعبوا أكثر ما كنت أتصور !!
    الواحد مننا يكتب شويه كلام ويرميه فى الدرج كدة كدة محدش هيعبروا اصلا ! 😂
    لكن الفنان بيكون قدوة لأجيال وأنت وفريقك وشركة ويكنينج على وجه الخصوص ليكم رساله وهدف وبجد فنانين
    استمرووووا 👌✌👍👍👍👍

    إعجاب

  26. صراحه اغنيه عنب تمام يعني 😀

    إعجاب

  27. حاتم مجدي 4 يونيو,2015 — 3:33 ص

    ال Cello من الثانية 8 لحد الثانية 13.. مش ده الكمان الضخم اللي من كتر ما هو ضخم بيحطوه علي الأرض مش علي كتافهم؟

    إعجاب

  28. güzel

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: