ألبوم اسمعني (٢) تفاصيل عامة

التجديد VS نفس الخلطة

أول هاجس كان مزعج بالنسبة لي إني أعمل ألبوم في الآخر يتقال عليه إنه “الجزء التاني من ألبوم إنسان”.. بمعنى الاستسلام لنفس الخلطة اللي أنا أعتقدت إنها نجحت في الألبوم السابق.. وأقع في غلطة تقديم نفس المحتوى على أمل إنه يحقق نجاح زي اللي قبله.. وده خطأ شائع جداً بيقع فيه فنانين كتير وكبار كمان.. تلاقيه عمل ألبوم كسر الدنيا وأغنية معينة تنجح جداً.. يقوم في الألبوم اللي بعده واخده Copy & Paste بس درجة أفتح شوية أو درجة أغمق شوية قال يعني كده عمل تجديد..

في أغلب الأحيان الألبوم ده بيفشل.. والراجل وشركة الانتاج يقعدوا يضربوا أخماس في أسداس هو فشل ليه.. والمشكلة أصلاً كانت من تفكيرهم.. الجمهور عادة بيبقى عنده صورة معينة وتوقع معين كوّنه عن الفنان من الأغاني اللي سمعهاله وعجبته.. أكبر خطأ إنك تشوف هو متوقع إيه وتعمله.. بالعكس.. يمكن أحسن لك تشوف هو كان متوقع إيه وتعمل عكسه تماماً!

طبعاً القصة مش بالسهولة دي.. لأنك لو غيرت نفسك ١٠٠٪ وقدمت حاجة عجيبة مش لايقة عليك مثلاً أو منقطعة تماماً عن الخط الفني اللي انت ماشي فيه (تغيير الGenre أو الArtist’s Identity مثلاً) ممكن تلبس في الحيطة.. وخصوصاً لو ده تاني أو تالت ألبوم ليك.. اللي هو انت لسه أصلاً لم تثبت نفسك وتحقق مهاراتك في حتة معينة.. ممكن ده يحصل في الرابع أو الخامس.. البيتلز عملوا كده بالمناسبة..

لذلك لازم يكون فيه نوع من التوازن.. تقدم شيء يعتبر نقلة نوعية بالنسبة لك بس بناء على ماسبق مش منقطع عنه.. كأنك بتطلع سلم.. ولا ينفع بعد ما تطلع سلمتين تقوم تنزل وتطلعهم تاني (تقديم نفس الخلطة) ولا ينفع تقوم رامي نفسك من المنور (تقديم عمل منقطع تماماً عنك)

كلمة السر اللي هتخليك تحقق المعادلة الصعبة دي هي إنك تكون صادق فعلاً ومش بتفتعل التجديد ومش حاطط المكسب المادي في رأس قائمة أولوياتك.. تجديدك يكون نابع من جواك فعلاً.. مبني على خبرات حياتيه ومشاهدات واقعية من جوه مجتمعك.. آراءك وأفكارك اللي بتتغير يوم عن يوم.. قناعاتك واكتشافاتك.. لو فعلاً التجديد ده شيء أصبح أصيل جواك يبقى هيطلع في العمل وهيتصدق وهتحقق المعادلة الصعبة..

أنا طبعاً كل ده بأكلم نفسي وبقول اللي في اعتقادي إنه الأصوب.. مش هأفتي لحد ولا هعيش دور الناصح يعني.. ده مجرد رأي وقناعة يمكن تكون صح ويمكن تكون غلط.

مين هيكتب؟ مين هيلحن؟ مين هيوزع؟

التلحين جزء مهم من دراستي الموسيقية، وبأبقى في أحسن حالاتي النفسية وأنا بأعمل لحن أغنية أو مقطوعة موسيقية.. يمكن أكتر من الغنا.. لذلك دايماً بأستبعد فكرة إن حد يعمل لي لحن.. ممكن تحصل وحصلت فعلاً في الألبوم ده وفي بعض الأغاني السينجل، لكن مش أول حاجة تيجي ف بالي إني أشوف ملحن..

إذن قراري كان بتلحين أغاني الألبوم.. وكون إن واحد بس يعمل ألحان ألبوم (كله أو معظمه) بيبقى شيء مستغرب بالنسبة لنا كثقافة موسيقية عربية مش فاهم ليه.. مع إن أغلب الألبومات العالمية اللي كسرت الدنيا بتبقى كلمات شخص واحد وتلحين شخص واحد ويمكن توزيع نفس الملحن كمان! عموماً التحدي اللي كان قدامي هو إن الألبوم يبقى متنوع لحنياً وما أكررش نفسي بدون داعي.. وده اجتهدت فيه على قد ما أقدر.

مين هيكتب؟ شوفوا.. أنا عندي إيمان تام وراسخ وعميق بجيلنا في الكتابة.. وأقصد جيلنا جيلنا.. الغلابة دول.. اللي تلاقيه شغال الصبح محاسب ويرجع البيت يكتب، أو طافح الدم في بلاد بره وينزل يطبع على حسابه الديوان بتاعه.. مش باتكلم على اللي جوه السوق وليهم أسماء كبيرة وكده.. أنا باتكلم على اللي فوق السوق! صحيح برا لكن أعلى منه فنياً.. أنا شايفهم كده.

طبعاً قعدت مع ناس كتير، واضطريت أسافر لناس منهم مخصوص عشان نقعد نفكر مع بعض.. مش عايز أنسى حد.. محمد السيد،  سامح خيري، إسلام بدر، أنس النيلي، مأمون عرفة، وغيرهم كتير.. الحقيقة لم أوفق في أي عمل معاهم في الألبوم ده.. نعمل ايه أمر الله! الحاجات دي بتيجي من فوق والله. مالناش يد فيها.

محمود فاروق استحوذ على الألبوم كله في النهاية.. وده عن استحقاق وجدارة الحقيقة.. قلمه متميز جداً جداً وأقرب للسهل الممتنع، وطريقة شغلي معاه بتبقى زي الشغل بين المخرج ومدير التصوير بالظبط.. اللي ليهم في السينما والتصوير هيفهموني.

بدأنا جلسات العمل في أول فبراير ٢٠١٣..  قعدنا ندردش في الأول.. كل واحد كان بيقول هو شايف الدنيا إزاي الأيام دي.. وجهة نظره في أمور كتير.. حكاوي حصلت حوالينا كل واحد قعد يحكيها.. وكل ما حاجة فيهم تنور بأمسك ورقة وقلم وأكتب فكرة طقت في دماغي أو دماغه.. بعد كام قعدة بقى عندنا أفكار كتيرة واعدة وبعضها منور ومبهر.. وبدأ من هنا الخيط يكر.. وطلبات دليفري الشاورما تهر.

البوستات الجاية إن شاء الله هأبتدي أكتب عن كل أغنية وتفاصيلها وكواليسها.. لذلك إركنوا محمود فاروق على جنب دلوقتي..

التوزيع بالنسبة لي شغل Creative جداً لكن مزعج جداً جداً في نفس الوقت.. لأنه بيستهلك وقت رهيب مني.. يعني أنا ممكن أقعد يوم بحاله عشان أظبط صوت Kick Drum حلو.. التوزيع يعني عدد لا نهائي من الأفكار في عدد لا نهائي من الاختيارات في عدد لا نهائي من المحاولات.. بالذات لما الواحد يوزع لنفسه.. بتدخل في موود وسواس قهري وممكن تقعد تعيد وتزيد واللي تعمله النهاردة ويعجبك، بكرة ما يعجبكش وتمسحه وتدور على غيره.. يمكن مش بأحس بالمشكلة دي لما بأوزع لناس تانية.. بأبقى أكثر تحديداً وأكثر ثقة.. نقول إيه.. حاجة كده شبه المثل بتاع باب النجار مخلع، أو الفيلم اللي كان فيه دكتور وابنه عيان ولازم يعمل له عملية..فيلم فقر كده مش فاكر كان اسمه ايه.. كان فريد شوقى باين

على أي حال! بعض الأغاني قمت بتوزيعها بنفسي، وبعضها الآخر سيبتها لموزعين تانيين زي مصطفى نجم (وهو موزع شاب نجم وعبقري بجد اتعرفت عليه لما سمعتله أغنية هو موزعها غاظتني وخلتني أنفسن منه :D) وزي التركي Emre Mogulkoc والأوزباكستاني Izzat Khalikov.. وفي أحيان أخري كانت مشاركة توزيع Co-Arranging معاهم

كفاية كده البوست ده عشان ما تزهقوش..

Advertisements

21 Comments

Add yours →

  1. البوم أكثر من رائع

    Liked by 1 person

  2. ما شاء الله والله يا مطربنا كل الالبوم بما فيه رائع من اختلاف ومضمون الاغانى راااااااااااااائع وعن الاحساس اللى بتوصلهولنا والصوت الجميل طبعاً :)) والالحان الرااااااااااائعة تسلم يارب يامطربنا انت حالة جميلة اووووووووووووووووى :)) بنحبك فى الله يا مطربنااااااااااااااااا 🙂

    إعجاب

  3. فعلا على قد تعبك بتاخد نصيبك ويمكن اكتر بكتير بكرم منةعند ربنا الالبوم حرك قلوبنا كلنا حتى الى كان ما يعرفش عن حضرتك حاجة عجبتة اغنية او اثنين وده بشهادة كل المقربين بجد جزاك الله خيرا على الالبوم وان شاء الله يبقى فى ميزان حسناتك
    #فنان-الثورة
    #مصر-بتتكلم-نمرة

    Liked by 1 person

  4. بصراحه انا مش عندي اي اعمل ولا حاجه بس مش انا لوحدي كله الحمزاويين عايزين يعرفه الالبوم مر عليكم ازاي =D
    وبصراحه الالبوم جميل جدااا وان شاء الله هيحقق اعلي من انسان كمان ^_^

    Liked by 1 person

  5. والله العظيم انت الحسنه الوحيده في الفن في البلد دي انل مش بسمع الا اغانيك انت وماهر زين وحبه مسعود كورتيس على رايف مش عشان ان معظم اغانيكم ديني وكدا لا انت لحنك وكلماتك وتوزيعك بجد محترمه وتستاهل احترام الناس ليك اولا وحبهم ثانيا كل التوفيق ليم يا فنان وبتمنالك مزيد من التقدم.

    Liked by 1 person

  6. اصلا مفيش كلام يتقال بعد اللي قولته في الالبوم .. هتفضل أحسن مطرب في جيلنا وعبر أجيال كتيرة جاية وهتفضل رقم 1 بالنسبة لي و اللي بيقدروا فنك و فن اللي زيك قليلين أوي .. كفاية إنك كنت النقلة الأولى والكبرى في حياتي اللي خلتني أنتقل لسماع النوع ده من الموسيقى و البعد عن الكلام المهروس كلام الحب و العذاب اللي لا بيودي ولا بيجيب و كله بقى شبه بعضه !! .. بتمنى ربنا يوفقك ويكرمك لأنك إنسان محترم و تستاهل كل خير و من نجاح لنجاح إن شاء الله 🙂

    إعجاب

  7. mohsenteko@yahoo.com 2 فبراير,2015 — 8:26 ص

    ياحمزه انت فنان رائع جدا ومحترم تحياتي ليك

    إعجاب

  8. عايز أقولك انى سمعت الألبوم ده أكتر من 100 مرة دلوقتى ولسة بسمعه والغريب انى مش بزهق منه زى لما بسمع لأى حد تانى .. لا ده انا بحس انى عايز اسمع اكتر واكتر وبحس بكل اغنية كأنى اول مرة اسمعها .. ربنا يوفقك يا حمزة وتفضل بالمستوى المتميز ده دايما وتبقى عند حسن ظننا بيك لأنك بجد انت بتمثلى الأمل البسيط اللى لسة شايفه فى البلد دى

    إعجاب

  9. حمزه انت فنان صوتك مميز واحساسك مميز جدا بس انا اختلف معاك ان كان لى حق الاختلاف فى نقطة انه شاعر واحد لكل الأغانى …. عامة انا حابب اتشرف بيك واسمعك كلام اغانى لى وان شاء الله يعجبك محمد فرحات AMRAIN_MF@HOTMAIL.COM ON FACEBOOK

    إعجاب

  10. البوم اكثر من رائع يا حمزه ويارب دايما من نجاح لنجاح.

    إعجاب

  11. ما شاءالله الكلام ده بجد يعني الفن حضرتك فنان حقيقي حمزه انت الاصل

    إعجاب

  12. ممتاز اقل ما يقال حتى اسلوبك فى الدردشه حلو اوى

    إعجاب

  13. Abd Elrahman elsayed 6 فبراير,2015 — 5:24 ص

    كمل يا حمزة فى النوتز دى مستمتع بيها و بكلامك جدا

    إعجاب

  14. أسوأ حاجة عملتها انك اعتمدت على شاعر واحد .. الالبوم كان ضعيف فى ناحية الكلمات .. المموضوع حلو لكن تلاقى الكلمات المعبرة عنه عادية وساعات هزيلة
    ياريت ترد على النقطة دى

    إعجاب

  15. محمد احمد فتحي 20 مايو,2015 — 2:25 م

    انا كان عندي استفسار عن اغنية القطر لو ممكن .. ليه في الفوكال لاين انت خليت التيك زى ما هو و ما شلتش منه اخدت النفس اللي في وسط الغنا .. اكيد الموضوع عنده قصة كنت حابب اعرفها ..

    إعجاب

  16. انا كنت متاكد ان الالبوم الجديد هيبقى مختلف عن اللى قبله
    بالتوفيق ومن نجاح لنجاح

    إعجاب

  17. انا كنت متاكد ان الالبوم الجديد هيبقى مختلف عن اللى قبله
    بالتوفيق ومن نجاح لنجاح

    إعجاب

  18. marwa abdElrahman 20 مايو,2015 — 5:52 م

    من متابعتى منذ لحظة التنويه عن ولادة ألبوم جديد ، بدا واضحا جدا إن العمل ده متحوط بتفاصيل دقيقة جدا وكثيرة جدا ومتشابكة جدا ، عشان كده فكرة تدوين هذه اللحظات فعلا من أجمل الأفكار اللى ممكن تيجى على بال فنان يحترم فنه وجمهوره ، اشتراك الجمهور فى كواليس العمل فى وجهة نظرى هو نوع من التقدير لكل هؤلاء ، الأهم أن كل هؤلاء يقدرون فنك ورقيك ، جميل جدا

    إعجاب

  19. معلش يا استاذ في سؤالي يمكن يكون محرج موقف حضرتك في شغلك عموما باختصار
    مع السيسى ولا ؟؟؟

    إعجاب

  20. الفاجر بلا منافس فى مجالكـ 🙂

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: