ألبوم اسمعني (١) تفاصيل عامة

ملحوظة: مرة أخرى المدونة دي للمهتمين بصناعة الموسيقى أو الناس اللي عندهم مشروع فني ويمكن يفيدهم التفاصيل الفنية اللي حصلت في ألبوم اسمعني

بدأت في ترتيب أفكاري في أوائل سنة ٢٠١٣.. شركة أويكنينج ادوني الضوء الأخضر إني أبدأ أتحرك وكانت الخطة إن الألبوم يخلص خلال السنة وينزل على آخر ٢٠١٣ أو بداية ٢٠١٤

طبعاً أول ما قولت بسم الله الرحمن الرحيم ما كانش عندي أدنى فكرة أنا رايح فين أو عايزأقول ايه بالظبط.. أصل الموضوع غالباً مش بييجي كده فنياً.. الواحد بيبقى لا بيه ولا عليه وبعدين يلاقي فكرة سيطرت عليه ويبدأ يشتغل عليها.. وبعد ما يخلصها بيقعد يسمعها ويشوف إذا كانت فكرة حقيقية ولا انعكاس باهت لأفكار قديمة.. ولو فكرة حقيقية بيحاول يتخيل مين اللي هيسمعها.. وهل هي مؤثرة بالنسبة له ولا لأ.. وبعد كل ده بيقرر إذا كان ينفذها فعلاً ولا تفضل مجرد تجربة في الدرج وخلاص.ـ

طبعاً كل ده لو أغنية كده في الهوا.. إنما لو انت بتحضر لألبوم فالموضوع بيبقى أصعب لأن هتضطر تدخل عامل الوقت في حسابك.. بالإضافة لتنوع الموضوعات وارتباطها ببعضها.. ده غير النمط العام اللي هتحاول تلتزم بيه موسيقياً في الألبوم.. يعني محددات كتيرة هتلاقيها بتقيدك وبتضغط عليك.. ده طبعاً غير تحكم شركة الانتاج في أغلب الأحوال وفرضها عليك تغني إيه وما تغنيش ايه لدرجة تحس بيها إنك مجرد زمارة بتلعب اللي على مزاج المنتج.. الحمد لله دي مش الحالة بتاعتي مع أويكنينج.. وده خلاني أكثر حرية في قراراتي لكن في نفس الوقت شايل مسئولية نجاح الألبوم فوق راسي مباشرة.. موال والله

طيب ندخل في تفصيلات تقنية شوية.. بما إني كنت الproducer في الألبوم.. ودي مش معناها في الموسيقى الإنتاج بمعنى الفلوس وكده.. لأ هنا بيبقى معناها أقرب لمسئول الرؤية الفنية..اللي هو بيكون عارف ايه نوع المزيكا اللي لازم تبقى في الألبوم.. الموضوعات.. مين اللي هيشتغل في الألبوم كملحنين وشعراء وموزعين ومهندسين صوت وعازفين عشان تصل للرؤية الفنية اللي انت عايزها وكده…ـ
فقررت إني أنفذ تسجيل صوتي وبعض الآلات بنفسي.. وقررت أعمل الميكس بنفسي في معظم الأغاني.. بما إني دارس الموضوع ده وكمان ما كنتش متأكد من نتيجة الميكس مع أي حد تاني..

الأجهزة اللي اشتغلت بيها

بالنسبة للأجهزة اللي قررت استخدامها في تسجيل الفوكال (صوتي) وميكس الأغاني كانت كالآتي:ـ
Brauner Phantera Microphone

20150126_121539

وده ميكروفون هايل..صحيح هو مش تيوب لكن أقرب حاجة لصوت الميكروفونات التيوب بتقنية جديدة كده الحاج براونر افتكسها.. والمايك ده بالذات له كاركتر بيعجبني.. صوته دافي وقوي جداً في الLow-End وفي نفس الوقت مش غامق خالص.. بالعكس الهاي اند بتاعه عالي جداً لدرجة انك هتضطر تخلي بالك في الChannel strip

بعد المايك يدخل الLA-610 universal Audio Channel strip
وده كمبريسور وليميتر وبري آمب محترم.. ولو عندك مايك على أد حاله ودخلت تحتيه الأستاذ ده بيضيف للصوت الأصلي تفاصيل تخليك ما تقدرش تفرق بين المايك ده وأي مايك من الفئات العالية.. (عندي تجربة ليه معShure KSM32والنتيجة كانت مذهلة)ـ

واستخدمت الAnalog Summing  في بعض الأغاني زي “أي كلام” و “لا تبك” و “كله بيعدي” وكانت تجربة جديدة بالنسبة لي.. لكن الصراحة مش في كل الأوقات كان أفضل اختيار وقررت أرجع للديجيتال.. ولو حد حابب يدور أكتر في أيهما أفضل هتلاقي حرب على الانترنت في الموضوع ده.. واللي مش عارف ايه ده، ده جهاز يحاكي الميكسرات الأنالوج.. فبعد ما تعمل الميكس بتاعك على أي أجهزة ديجيتال بتودي كل التراكات للجهاز ده يضيف عليها الاحساس الأنالوج (اللي هو بيبقى
More Warmer — Better Low End — Better Stereo Image and space
وبعدين ترجع التراكات تاني لجهازك الديجيتال وتخلص الأغنية
نوع الجهاز اللي استخدمته هوDangerous D-Box

بالنسبة للAudio Interface
في رأيي اليونيفرسال أوديو (أبولو) عبقري Universal Audio — Apollo Interface

 أنا اشتغلت على أجهزة أعلى منه لكن مالقيتش زي جودة صوته وكاركتر مميز فعلاً.. ده غير الPlugins الخاصة بيه مميزة فعلاً وبتحاكي بشكل كبيرالأجهزة الحقيقية ويمكن تتفوق عليها في بعض الأحيان
ودي صورة للتلات أجهزة بالترتيب

20140804_173032

الMonitor Speakers اللي عملت عليها الميكس هم: Neumann KH120

20150126_121713

ودي شركة ألمانية متخصصة في المايكروفونات وأنتجوا السماعات دي وموديل تاني أكبر شوية.. الموديلين دول عاملينReviews ممتازة على الانترنت وهم بجد ممتازين للميكس.. مختلفين عن الADAM شوية لكن في رأيي هم أحسن.. الADAM صوتهم mid range أكتر شوية.. لكن الKH120 صوتهم معبر عن الحقيقة أكتر والLow end بتاعهم واضح..

وكمان استخدمت في الميكس السماعات ال Avantone

20150126_121727

ودول عبقريتهم تتلخص في إنهم بيسمعوك أسوأ صوت ممكن.. فتعرف الأغنية هيبقى شكلها إزاي على سماعات رديئة أو صغيرة زي سماعات الكمبيوتر أو اللاب توب مثلاً أو سماعات التلفزيون.. فطبعاً وانا باعمل الميكس بأسمع على السماعات الKH120 ولما الميكس يعجبني بأسمع على الavantone قبل ما أعتمد.. وساعات بأبدّل بينهم أثناء الميكس.

الDAW اللي اشتغلت بيه في التوزيع والميكس هو البروتوولز Protools 10 .. متعود عليه من زمان وسهل بالنسبة لي.. بس مش عارف ليه بدأت أقفش عليه من ساعة ما عملوا النسخة 11 وقررت أنتقل تدريجياً من بعد الألبوم لLogic pro X .. أنا لسه بين الاتنين حالياً

البوست اللي جاي إن شاء الله هدخل أكتر في التفاصيل الفنية العامة لألبوم اسمعني.. قبل ما أمسك كل أغنية وأشرّحهالكم 🙂

Advertisements

36 Comments

Add yours →

  1. فكرة رائعة وشغل ممتاز جدا يا فنان وبانتظار تفاصيل أكثر عن مراحل صناعة الألبوم وطريقة اختيارك للكلام و اللحن وكمية المجهود اللي بيتبذل في الألبوم علشان الناس فاكرة إن الموضوع طبل وزمر وخلاص 😀

    كمان الكواليس والمواقف اللي مريت بيها أثناء صناعة الألبوم هتكون حاجة ظريفة جدا 😀

    إعجاب

  2. ابدعت اخي حمزة البومك نارى و معانيه قوية و الكلمات و الالحان مش قادرة اوصفلك احساسي ناحية الالبوم لاني و انا بسمعه ضحكت و عيطت و اتحمست ، كانت احاسيس كتير ، البومك بقئ مرض بالنسبة ليا و مش هخف منه ابدا لانه رائع بكل المقاييس ، مع السلامة هي الاجمل على الاطلاق ، لا اجد كلمات تصف روعة الالبوم … اتمنى ان توفرو السيدي في الجزائر فنحن نحبك هنا و نريد ان ندعمك بشراء النسخة الاصلية ، بتمنى نشوفك في الجزائر قريبا و نسمعك مباشرة و انت بتغنى على مسارحها … تحية ليك من امي الى اول ما شافت مقابلة حضرتك مع استاذ عمر الليثي قالتلي الالبوم داه يبقى على موبايلي حالا و بقت تشغله و هي بتعمل شغل البيت و عجبها جدا ، و تحية ليك مني انا فاطمة الزهراء شيبوني من الجزائر .

    إعجاب

  3. Muhammad Abdel-shafy 27 يناير,2015 — 12:20 م

    الالبوم اكثر من رائع كالعادة
    بجد كلمات والحان وصوت ولا اروع, غناء هادف بكل معنى الكلمه
    حمزة الوحيد اللى غير الغناء “اللى بنشوفه فى كتير من المطربين الله يهديهم” الى معانى وغايات انسانية بجد
    حمزة خليك على الدرب وبالتوفيق دائما ان شاء الله :))

    إعجاب

  4. مبدع على طووووووووووووووووووووول ما شاء الله يامطربنا الجمييييييييييييييييييل بعد المدة دى والشغل الجامد ده طلع البووووووووم فووووووووووووووق الوصف بكل الالحان والكلمات وصوت حضرتك طبعاً جميييييييييييييييييييييل اوى وغانى هادفة ومبسمعش غيرها وكمان ماهر زين :))

    إعجاب

  5. تسلم يــــــــــــــــــارب يا مطربنا 🙂

    إعجاب

  6. الله عليك يا اسد

    إعجاب

  7. ربنا يكرمك يا أستاذ حمزة و يوفقك و يرزقك من حيث لا يحتسب . أنا لسه مبتدأ جدا في شغل الصوتيات عموما سواءا غنا أو عزف أو حتى توزيع و حضرتك مثلي الأعلى و قدوتي في الأمر ده . و باحلم في يوم من الأيام أضيف صوت جديد للفن الهادف الراقي 🙂 🙂

    إعجاب

  8. ألبومك أكثر من رائع ومن قراءاتي الدائمة حول الالبوم اعتقد ان سبب النجاح يعو د للأفكار التي استطاعت الخروج عن النطاق المحلي لتصل معانيها لكل بيت عربي

    إعجاب

  9. الله ينور .. عايزك بس تفكر في ان كام واحد فعلا بيحب نوع الفن اللي انت بتقدمه وقد ايه بتخرجهم من الحاله السيئه بتاعة البلد .. بالتوفيق 🙂

    إعجاب

  10. عندي ليك سؤالين ..
    1- عايز اعرف الفكره في اغنية صباح الخير ” كلها امل ” .. و,وباقي اغاني الالبوم ” كلها الم ” ؟ّ!
    2- احنا في هندسه المنصوره حفل التخرج بتاعنا شهر 7 اللي جاي .. في امكانيه انك تيجي 🙂 ؟!

    إعجاب

  11. نقدر نقول علشان كدة القرار في غنوة اسمعني في جملة “غصب عني لاقيتك بتاخد قراري” كان واضح وبيور جدا … وكذلك تركيبة الفوكال في اخرها الجواب بتاعه كان واضح جدا ولا ايه رائيك …

    إعجاب

  12. على الرغم أنى مليش فى الأمور الفنية بس أستمعت و الله بالقراءة 🙂 عشان عرفت تفاصيل جديدة و حلوة و عالم مكنتش أعرف تقنياته 🙂 مستنية أعرف التفاصيل عن كل أغنية ، أنت شوقتنى جدااا 🙂

    إعجاب

  13. طول عمرك جامد يا برنس

    إعجاب

  14. الحمد لله مش فاهمه حاجه بس الالبوم رااااااائع بجد كل يوم بشغله وبنتي اللي عندها سنتين حفظته

    إعجاب

  15. you are the perfect persone for this job you’r amazing

    إعجاب

  16. البوم فوق الممتاز

    إعجاب

  17. بجد الالبوم رائه وانت شخص رائع .. لكن الفكرة دي أروع بكتير من كل حاجه فى صناعة جيل جديد يقدر يعمل حاجات مكنش فاكر انه يقدر يعملها .. بالتوفيق ان شاء الله

    إعجاب

  18. الله عليك يا فنان

    إعجاب

  19. انا مبسوط انك قررت تشارك خبرتك مع الكل.. خاصة لان النتيجة اللي طالعة في الالبوم رائعة وده مش غريب عليك طول عمرك “انسان” 🙂
    شكرا جدا وكل التوفيق في كل اللي جاي ان شاء الله

    إعجاب

  20. البووووووووم اكتر من رائع و يا رب يوفقك دايما فى الخير

    إعجاب

  21. ليا الشرف لو قبلت كلمات منى … وحلم أنى أكون شاعر غنائى … ولو قريت الرسالة فقد …أيضا لىا الشرف ..
    اسمى عبدالرحمن .. من عشاق #حمزة_نمرة ♥

    إعجاب

  22. هـــــايل جدا جدا (Y) (Y) مستنيين البوست الجاي و كلمنا اكتر عن الـ Plugins اللي استخدمتها و مش بس plugins الـ instruments كلمنا اكتر عن الـ plugins اللي استخدمتها في الـ beats و مكس الـ chorus أنا بقول تعمل videos بالمرة تبقى عملت معانا الصح احنا غلابة و الله هههههههههههه 😀

    إعجاب

  23. روووووووووووووووووووووووووعه ياحمزه ومستنيين تفضيل اكتر عن البوم اسمعني

    إعجاب

  24. الألبوم جميل وصوتك اجمل بس لى تعليق على غنوه هى ضلمت كده ليه اللحن شبيه جداً يكاد يكون مطابق لرقصه اسمها رقصة البطريق مشهوره دايماً بيرقصوها فى الأفراح بره ودلوقتى كمان بدأت تنتشر فى الأفراح عندنا أسفه بس لازم أنبهك مش عيب انك تأخذ تيمه عالميه بس المفروض تذكر انها مستوحاه منها

    إعجاب

  25. والله اناياحمزة استفدت معلوماات كنت بحاول انا اطلعها من الالبوم “وطبعا معرفتش” حاجات انا كنت بدور عليا معاك لقيتها ,,,انا بس بحاول اعرف اكتر فى اصل المجال دة وكل التفاصيل عنة صغيرة او كبيرة … بس والله كلام كنت نفسي اقراه من زمان ,,على كل حال شكراااا
    والله مافى زيك .. 🙂
    مستنى الموضوع الجاي احر من الجمر
    تسلم يااافنااااااااااان………. تحيااااتى ليك

    إعجاب

  26. دا تسجيل من تعليمك ياااعم
    ويارت تقولى ايه رايك؟؟
    مع العلم:تم التسجيل على اللاب توب :

    إعجاب

  27. كلام جميل جداً جداً …. وياريت تتكلم عن التوزيعات اكتر … مقامات الاغاني والفواصل الموسيقية

    إعجاب

  28. البوم رائع واغنية مع السلامة الاروع اتمنى انها تكون كليب

    إعجاب

  29. جميييلللللل اوووي الالبوم ربنا يخليك ليناا وتفضل رافع راس بلدناا لفوووق باغانيك الهاادفه دي اللي كبير وصفير بيسمعها ❤️

    إعجاب

  30. يوسف السيد المتولي 6 فبراير,2015 — 10:19 م

    ليه ما فكرتش يا استاز حمزة انك تصدر نسخ لالبوماتك بالاكابيلا البشرية ،،، فهناك قاعدة جمهورية لا يستهان بها لا تحب الموسيقى،،واعتقد ان الفنان ماهر زين قد سبقك الى ذلك .. لذا اطلب منك ان تفكر في الموضوع جديا،،،،وشكرا لقراءتك رسالتي،،،ومن ابداع الى ابداع ان شاء الله

    إعجاب

  31. رائع بجد إنو حضرتك بتقلنا عن كل تفصيلة موسيقية بخصوص الألبوم دا

    إعجاب

  32. ahmed abou elela 9 مارس,2015 — 2:12 ص

    ممكن لو سمحت نعزف أغنية تسمحيلي ياما في فرقة المدرسة عود لو حضرتك وافقت يا ريت تبعتلي النوتة علشان مش عارفين نوصلها و شكرا

    إعجاب

  33. انا عندى تعليق واحد بس يلخص كل اللى عاوز اقوله انى عمرى ما عرفت ولا اعترفت بمعنى كلمة فن هادف الا لما سمعتك يا حمزة .. حقيقى انسان راقى جدا وبالتوفيق دايما يارب 🙂

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: